Жылдамдықты асырғаны үшін айыппұл 220 мың теңгеге дейін ұлғаяды – ІІМ заңға өзгеріс енгізіп жатыр

Қазіргі заңнама бойынша бұл айыппұл 40 АЕК (147 680 теңге).

ҚР ІІМ әкімшілік полиция комитетінің басқарма басшысының орынбасары Төлеген Рысбеков Ulysmedia.kz тілшісіне көлікпен жылдамдықты асырып жүретіндерге жаза қалай күшейтілетінін айтып берді.

– Қазір Мәжілісте тиісті заң жобасы қаралып жатыр. Онда жылдамдықты сағатына 60 шақырымнан асырғандарға жылдамдық сағатына 120 шақырымнан асқанда ғана жаза күшейтіледі. Қалғаны бұрынғыдай қала береді. Қаланың ішінде де, сыртында да, – дейді ол.

Олар қалай жазаланады?

Мұндай заңбзұушылыққа жол бергендерге айыппұл 60 АЕК-ке (221 520 теңге) ұлғаяды. Қазіргі заңнама бойынша бұл айыппұл 40 АЕК (147 680 теңге).

Рысбековтың айтуынша, жаза «жылдамдықты жақсы көретіндерге ғана» күшейтіледі.

– «Қарапайым» адамдарға қатысы жоқ, – дейді ол.

Тағы қандай өзгерістер?

Рысбеков сонымен қатар, «орташа жылдамдықтан асыру» деген түсінік енгізіліп жатқанын айтады.

– Бұл қалай? Бұл заңбұзушылық тек қала сыртына шыққан көліктерге қатысты. Мәселен, Астанадан Қарағанды жол бар делік. Жолдың тіке учаскесі бар. А пунктінен Б пунктіне дейін қанша уақытта жетуіңіз керектігі есептеледі. Яғни, сіздің жылдамдығыңызды камералар есептеп шығарады. Мәселен, . А пунктінен Б пунктіне дейінгі жолды сіз 1 сағатта басып өтуіңіз керек делік. Ол жолды жарты сағатта өте шықсаңыз, демек орташа жылдамдықты арттырғаныңызды білдіреді. Оларға автоматты түрде айыппұл салынады. Айыппұл мөлшері математикалық есеп бойынша беріледі, – дейді ол.

Оның айтуынша, өзі айтқан Астана Қарағанды тас жолында сағатына 200 шақырым жылдамдықпен жүретіндер бар.