Интернет балалар үшін несімен қауіпті болуы мүмкін: полиция ескерту жасады

Полиция ата-аналарға балаларды қауіптен қорғауға көмектесетін негізгі ережелерді сақтауды ұсынады.

Полиция жазғы демалыс алдында интернеттің балалар үшін несімен қауіпті екенін саралады, деп хабарлайды Polisia.kz.

Оң-солын дұрыс ажырата алмайтын жасөспірімдер киберкеңістіктің теріс әсеріне ұшырауы мүмкін. Әр түрлі сайттарға кіріп, топтар мен қауымдастықтарға тіркеліп, кәмелетке толмаған бала бейтаныс адамдармен виртуалды байланысқа түседі.

Бөтен адамның ықпалына тез беріліп, бала өзінің “жаңа досына” банк картасының нөмірі, телефон нөмірі, жеке кабинеттер мен парақшалардың құпия сөздерін, тұрғылықты мекенжайы туралы айтып қоюы мүмкін.

Сонымен қатар күдікті адаммен виртуалды қарым-қатынас өмірдегі кездесулерге ұласу қаупі бар. Одан бөлек, жеткіншек ақша табу мақсатында закладчик-курьерлерді жинайтын хабарландырулардың құрығына түсіп қалуы мүмкін.

Полиция ата-аналарға балаларды қауіптен қорғауға көмектесетін негізгі ережелерді сақтауды ұсынады:

• Баланың мінез-құлқы мен жаңа қызығушылықтарына назар аударыңыз;
• Егер бала интернетте алған тапсырмаларды өмірде орындаса, оған тез арада назар аударыңыз;
• Мазмұны кәмелетке толмағандарға теріс әсер етуі мүмкін ресурстарға шектеу қойыңыз; – Балаға жеке ақпаратты жарияламау керектігін үйретіңіз;
• Әлеуметтік желілерде балаңыздың қандай топтар мен қауымдастықтарға жазылғанын қадағалаңыз;
• Балаға бөтен адаммен сөйлесудің қауіпті екенін түсіндіріңіз;
• Ықтимал қауіп анықталған жағдайда дереу полицияға хабарлаңыз.