Су тасқыны және ТЖ: Батыс Қазақстанда екі жүзден астам үй тұруға жарамсыз болып шықты
Қанат Шарлапаев Батыс Қазақстан облысында су тасқынынан зардап шеккендерге көмек көрсететін мамандандырылған алаңда болды.
ҚР Өнеркәсіп және құрылыс министрлігі баспасөз қызметінің хабарлауынша, аталған алаң БҚО цифрлық технологиялар басқармасының базасында су тасқынынан зардап шеккен үйлерді техникалық тексерумен және азаматтарға көмек көрсету үдерісін жеделдету мақсатында құрылған.
Қанат Шарлапаев азаматтардың өтініштеріне жедел ден қоюдың маңыздылығын атап өтіп, барлық қажетті іс-шараларды жеделдетуді тапсырды.
Сонымен қатар, министр көмек пен ресурстарды тең бөлу үшін сапалы және нақты техникалық зерттеулер жүргізу қажеттігін туралы айтты.
Батыс Қазақстан облысында су тасқыны салдарынан екі жүзден астам үй тұруға жарамсыз болып қалған.
Министрліктің мәліметі бойынша, Қаратөбе, Сырым және Теректі аудандарында құрылысты 2024 жылдың қыркүйегінде аяқтау жоспарланған.
«Қаратөбе ауданында 97 үй зардап шексе, оның 90 үй тұруға жарамсыз, 7 үй жөндеуді қажет етеді. Құрылыс сатысында 90 үй тұр, оның ішінде жаңа алаңда 72, бұрынғы учаскелерде 18 үй салынып жатыр», — деп жазылған хабарламада.
Сырым ауданында 257 үй зардап шекті: 114 үй тұруға жарамсыз, 149-ы жөндеуді қажет етті. 114 үй құрылыс сатысында, оның ішінде 51 үй жаңа алаңда, 63 үй бұрынғы учаскелерде салынып жатыр.
Теректі ауданында 45 үй бүлінген, 23 үй жарамсыз, 21 үй жөндеуді қажет етеді, 1 үй сатып алынды. Құрылыс кезеңінде жаңа алаңдарда 18 үй салынып жатыр.
Нысандарды тексеру барысында Қанат Шарлапаев нысандарды құрылыс материалдарымен толық қамтамасыз етуді және құрылыс сапасын бақылауды күшейтуді тапсырды.
