Оралдағы техникалық қызмет көрсету станциясы (ТКС) қызметкерінен қару-жарақ табылды
Ол қарудың бір бөлігін жұмыста, бір бөлігін үйде сақтаған.
«Құқықтық тәртіп» жедел-профилактикалық іс-шарасы аясында БҚО ПД Экстремизмге қарсы іс-қимыл басқармасының қызметкерлері Орал қаласы тұрғынының жұмыс орнынан қолдан жасалған 5,6 мм шолақ тапанша тауып, тәркіледі. Сондай-ақ, оның тұрғылықты жерін тінту барысында оптикалық көздеуі бар пневматикалық тапанша тапты.
Аталған факті бойынша қылмыстық іс қозғалды. Сараптама қорытындысына сәйкес тәркіленген заттың қолдан жасалған атыс қару екені анықталды.
Тергеу жұмыстары жүргізілуде.
Айта кету керек, 1-10 маусым аралығында өтіп жатқан республикалық «Құқықтық тәртіп» жедел-профилактикалық іс-шараның нәтижесі бойынша 119 қылмыс тіркелді. Тыйым салынған заттарды алып жүргені және сақтағаны үшін 22 азамат ұсталды, олардан 4 есірткі заты, 13 бірлік атыс қаруы, 229 оқ-дәрі тәркіленді.
Аталған іс-шара барысында 4 111 әкімшілік құқық бұзушылықтың жолы кесілді, оның ішінде 401 ұсақ бұзақылық, 451 ішімдік ішу және қоғамдық орында мас күйде жүру. Сондай-ақ, көлік құралдарын масаң күйде басқарған 33 жүргізуші ұсталды.
