Қазақстанда біржолғы зейнетақы төлемдерін пайдалану бойынша өзгерістер енгізілді
«Отбасы Банк» АҚ депозиттерінде қаражатты жинақтау мерзімі 3 жылдан 6 жылға дейін ұзартылды.
Біржолғы зейнетақы жинағын тұрғын-үй жағдайын жақсарту үшін пайдалану ережесіне өзгеріс енгізілді, деп хабарлайды Қазақстан құрылыс және өнеркәсіп министрлігі.
13 шілдеде министрдің бұйрығымен 2021 жылғы 21 қаңтардағы №24 индустрия және инфрақұрылымдық даму министрінің бұйрығымен бекітілген біржолғы зейнетақы төлемін тұрғын-үй жағдайын жақсарту үшін пайдалану қағидасына өзгеріс енгізіліп отыр.
«Осылайша, енгізілген өзгерістерге сәйкес тұрғын үй сатып алу мақсатында бұрын біржолғы зейнетақы төлемімен толықтырылған «Отбасы Банк» АҚ депозиттерінде қаражатты жинақтау мерзімі 3 жылдан 6 жылға дейін ұзартылды», – делінген ресми хабарламада.
Бұдан бөлек, депозитті ерлі-зайыптыға және (немесе) жақын туыстарына беруге болады. Бірақ мұндай салымды одан әрі үшінші тұлғалардың атына аударуға тыйым салынған.
Бұйрық ресми жарияланғаннан кейін 10 күнтізбелік күн өткен соң күшіне енеді.
Бұйрықтың мәтінімен мына сілтеме бойынша танысуға болады.
