БҚО-да жерді заңсыз қазып, топырақты пайдаланған компанияға 22 млн теңге айыппұл салынды
Аумақтық бөлімше «Подстепное — Федоровка — РФ шекарасы» автомобиль жолындағы бұзушылықтарды жою бойынша кешенді іс-шараларды қабылдау туралы ұйғарым жазып, ұсынымдар енгізді.
Жоспардан тыс тексеру барысында ҚР АШМ Жер ресурстарын басқару комитетінің Батыс Қазақстан облысының аумақтық бөлімшесі Теректі және Ақсуат ауылдық округтерінде топырақтың құнарлы қабатын заңсыз алу түріндегі бұзушылықты анықтады. Бұл туралы ҚР АШМ баспасөз қызметі хабарлады.
«Кәсіпорынға 22 млн теңге көлемінде әкімшілік айыппұл салынып, мемлекет кірісіне өндірілді. ҚР Жер кодексінің 140-бабына сәйкес жер учаскелерінің меншік иелері мен жер пайдаланушылар бүлінген жерлерді қалпына келтіруге, олардың құнарлылығын және жердің басқа да пайдалы қасиеттерін қалпына келтіруге және оны шаруашылық айналымға уақтылы тартуға бағытталған іс-шараларды жүргізуге міндетті»,- деп хабарлайды ҚР Ауылшаруашылығы министрлігінің баспасөз қызметі.
Аумақтық бөлімше «Подстепное — Федоровка — РФ шекарасы» автомобиль жолын қайта жаңғырту жобасы аяқталғаннан кейін 3 ай ішінде бұзылған жерлер мен оның құнарлылығын қалпына келтіру жолымен анықталған бұзушылықтарды жою бойынша кешенді іс-шараларды қабылдау туралы ұйғарым жазып, ұсынымдар енгізді.
ОҚИ ОТЫРЫҢЫЗ: БҚО-да екі жер қойнауын пайдаланушы жерге мемлекеттік меншік құқығын бұзған
