Оралда мопед пен самокат жүргізушілеріне қатысты құқықбұзушылық фактілері мен жол-көлік оқиғалары көбейген
Жыл өткен сайын елімізде темір тұлпарлардың саны артпаса кеміген емес. Олардың арасында техниканың қарыштап дамуының нәтижесінде қатарға жаңадан қосылған скутер, мопед, электросамокат сияқты көлік түрлері тағы бар.
БҚО полиция департаментінің 25 шілдедегі мәліметі бойынша облыста электрлі скутер және мопедтердің қатысуымен 90 жол-көлік оқиғасы тіркеліп, соның салдарынан 2 адам қаза тауып, 64 адам дене жарақатын алған.
Күні кеше Орал қаласында Мұхит пен А.Карев көшелелерінің қиылысында скутер жедел жәрдем көлігіне соғылып, жүргізушісі ауруханаға жеткізілді.
БҚО полиция департаментінің баспасөз қызметінен мәлім еткеніндей, оқиға 28 шілде күні кешкісін болған.
«Жүргізуші маркасы анықталмаған, мемлекеттік нөмірі жоқ скутермен келе жатып, Hyundai жедел жәрдем көлігімен соқтығысуға жол берген. Жол апаты салдарынан скутер жүргізушісі түрлі жарақатпен ауруханаға жеткізілді. Қазіргі кезде оқиғаның жай-жапсары анықталып жатыр», деп хабарлады ведомстводан.
БҚО денсаулық сақтау басқармасы баспасөз қызметінің нақтылауынша, шақырту сағат 19.35-те түскен. Оқиға орнынан 2005, 1995 және 2001 жылғы жігіттер жедел жәрдем бригадасымен облыстық көпбейінді ауруханаға жеткізілді. 2005 жылғы жігіт аурухананың хирургия бөлімшесіне жатқызылды. 1995 жылғы ер адамға амбулаториялық ем тағайындалып, үйіне жіберілді. 2001 жылғы жігіт ауруханаға жатудан бас тартты, ол да амбулаторлық ем алатын болады.
