БҚО-да білім күніне арналған салтанатты іс-шара қашан өтеді
Жексенбіге қарамастан оларға барлық сынып оқушылары қатысады.
БҚО білім басқармасының баспасөз қызметінің мәліметінше, білім күніне арналған салтанатты іс-шаралар дәстүрлі түрде 1 қыркүйекте еліміздің барлық өңірлерінде, соның ішінде біздің облыста да өтеді.
Министрліктің хабарламасы
2024-2025 жаңа оқу жылында 345 мың бірінші сынып оқушысы алғаш рет мектеп партасына отырады. Олар үшін 1 қыркүйекте «Мектебім – мейірім мекені» тақырыбында салтанатты шара өтеді.
2 қыркүйекте – жаңа оқу жылының бірінші күні – «Менің Отаным – Қазақстан» тақырыбында Бірыңғай сынып сағатымен басталып, әрі қарай сабақ кестесіне сәйкес жалғасады.
Педагогтарға ақы төлеу
– Педагогтердің еңбегіне ақы төлеуге қатысты Қазақстан Республикасы Еңбек кодексінің 79-бабына сәйкес жұмыс беруші қызметкердің нақты жұмыс істеген және жұмыс істемеген уақытының есебін жүргізуге міндетті екенін хабарлаймыз, – делінген хабарламада.
Демалыс және мереке күндері жұмыс істеген қызметкердің қалауы бойынша басқа демалыс күні беріледі немесе қызметкердің күндік (сағаттық) мөлшерлемесі бойынша кемінде екі есе мөлшерде ақы төленеді.
Соңғы мәліметтер бойынша, БҚО-да 376 жалпы білім беретін мектеп жұмыс істейді, онда 120 мыңнан астам бала оқиды.
