«Бас дәрігерлер–жемқор»: Біртанов медицина саласындағы сұмдықтың бетін ашты

Өкінішке қарай біздің денсаулық сақтау саласында жемқорлық өте көп болып тұр. Оның көбі бас дәрігерлерге, басшыларға байланысты.

Қазақстан инновациялық университетінің медициналық директоры Елжан Біртанов денсаулық саласындағы олқылықтарды айтты, деп хабарлайды Orda.kz.

«Сұрауы бар» YouTube  арнасында Елжан Біртанов медицинадағы жемқорлықтың өршіп тұрғанын айтты.

«Өкінішке қарай біздің денсаулық сақтау саласында жемқорлық өте көп болып тұр. Оның көбі бас дәрігерлерге, басшыларға байланысты. Оны жоюға тырысуымыз керек. Оны қалай жасауға болады? Бір жағынан, арнайы органдар бар, олар тексереді, қорқытады», –  дейді ол.

Біртанов өзіне бас дәрігерлердің арыз-шағыммен келетінін жеткізді.

«Маған көп бас дәрігерлер келеді. «Аурухананы органдар есепке қойып қойған» дейді. Оларға тендерді кімнен алу керегін айтады екен. Мысалы «тамақты мынадан аласың, алмасаң сотқа кетесің» дейді екен. Бұндай қысым көп жерде бар. Өз алдына жұмыс істеуге жол бермейді. Ондай іске араласқаннан кейін, бас дәрігердің өзі де жемқор болып кетеді. Дәл солай арнайы адамға тендер беріп қояды», – деді Біртанов.

Сұхбат барысында бұндай заңсыз істерді қалай жоюға болатыны да айтылды. 

«Біз бір ұсыныс тастадық. Күнделікті басқару жүйесін ашық қылуымыз керек. Бұл үрдіс шетелде де бар. Басшы тек өзі ғана шешім қабылдамай, ұжыммен ақылдасып, ұжымға немесе меңгерушіге, орынбасарға көрсетуі керек. Өйткені бір адам болса, тығып ақша жымқыра алады. Ал басқалары бас тартуы мүмкін. Бұл істің дұрыс еместігін айтады. Не бір ұжым кетеді»,  – дейді Елжан Біртанов.