Отбасылық және тұрмыстық зорлық-зомбылық үшін жауаптылық
Қазақстанда тұрмыстық зорлық-зомбылық үшін жазаны криминализациялау туралы айтылып келе жатқанына көп болды.
2024 жылғы 16 маусымнан бастап Бөрлі ауданында 18 қылмыстық теріс қылық, ал тоғыз айда алты қылмыс тіркелді. Отбасылық-тұрмыстық зорлық-зомбылық үшін әкімшілік жауапкершілікке 1961 адам тартылып, 872 адам қамауға алынған. Жыл басынан бері 54 өтініш тіркеліп, оның ішінде 38 өтініш зардап шеккендердің өздерінен келіп түскен.
– Талдау көрсеткендей, көршілерден тұрмыстық зорлық-зомбылық туралы хабарламалар келіп түспейді, алайда Бөрлі ауданының полиция қызметкерлері жәбірленушінің өтініші болмаса да, тұрмыстық зорлық-зомбылық жағдайында материалдар, көршілердің сауалнамаларын жинайды. 2023 жылдың наурыз айынан бастап ауданда «Тұрмыстық зорлық-зомбылық құрбандарына арнаулы әлеуметтік қызмет көрсету орталығы» жұмыс істейді. Орталықта қиын өмірлік жағдайларға тап болған азаматтар тегін тұрумен, тамақпен, киіммен, гигиена құралдарымен қамтамасыз етіледі, сондай-ақ оларға мамандардың құқықтық көмегі көрсетіледі. 2024 жылдың ағымдағы кезеңінде 29 адам әлеуметтік көмек алды, оның ішінде 10 әйел, 18 бала және бір ер адам. Жыл басынан бері 169 қорғаныс ұйғарымы шығарылды, 39 адамға учаскелік комиссарлардың өтініші бойынша мінез-құлыққа ерекше талаптар қойылды. Яғни, оларға зорлық-зомбылық құрбандарын іздеуге, қудалауға, сөйлесуге және кез-келген қаруды сатып алуға, сақтауға немесе алып жүруге тыйым салынады. Алкогольді асыра пайдаланатын үйде әйелдер зардап шегетін жағдайлар жиі кездеседі. Жыл басында ауданда маскүнемдіктен емделуге 13 адам жіберілді, – деді БҚО полиция департаменті.
Ведомствода кәмелетке толмағандар ісі жөніндегі учаскелік инспекторлар кәмелетке толмағандарға қатысты құқық бұзушылық фактілерін тұрақты негізде анықтайтынын атап өтті. Көбінесе ата-аналар балаларды тәрбиелеу және оқыту бойынша өз міндеттерін орындамайды. Олар балалардың қалыпты өмір сүруіне, оқуына жағдай жасамайды және олардың санасына теріс әсер етеді. Мұндай ата-аналар есепке алынады, қазір осындай жеті отбасы бар, онда 10 кәмелетке толмаған бала тәрбиеленуде.
