Қазақстандық фермерлерге субсидияларды беру тоқтатылады

2029 жылға қарай агроөнеркәсіптік кешендегі субсидиялардан мүлдем бас тартып, оларды осындай жеңілдетілген қайтарымды ресурстармен алмастырылмақ.

Премьер-министрдің орынбасары — Ұлттық экономика министрі Нұрлан Байбазаров алдағы уақытта мемлекеттің агроөнеркәсіптік фермерлерге субсидия беруден бас тартатынын айтты. Бұл туралы Stan.kz ақпарат агенттігі хабарлайды. 

Ол жалпы мемлекет агроөнеркәсіптік кешенді субсидиялау саясатын өзгертуді жоспарлап отырғанын алға тартты. Бұрынғы шарттар енді бес пайыздық қарызға ауыстырылмақ.

«Біз субсидиялардан бас тартамыз. Экономиканы реттеу туралы жарлық қабылданды. Сондай-ақ, нақты шаралар бар. 2029 жылға қарай агроөнеркәсіптік кешендегі субсидиялардан мүлдем бас тартып, оларды осындай жеңілдетілген қайтарымды ресурстармен алмастыру керек. Өйткені жыл сайын шынымен үлкен сома жұмсалды. Осы субсидиялардың нәтижелілігіне қатысты сұрақтар болды. Яғни, ақша қайтарылса мұнда мүлдем басқа тәсіл болады және фермерлердің жауапкершілігі артады», – деді Нұрлан Байбазаров.

Сонымен қатар ол қазір барлық субсидияларды беруді автоматтандыру туралы шешім қабылданғанын айтты. Мұны Агрокредиттік корпорация цифрлық платформада жүзеге асыратын болады.

«Адамдар аяқпен жүрмейді, біреумен келіспейді немесе заңсыз жолдармен субсидия алмайды. Цифрландыру көптеген мәселелерді шешеді», – деп қосты ол.