“Бір — екі минутқа қалдырдым: көлігім ұрланды” — Орал қаласында патрульдік полиция қаскүнемді ізін суытпай ұстады

Иесі өзінің “Рено” маркалы көлігін үйдің ауласына қойып, көліктің қозғалтқышын сөндірмей, оны бірнеше минутқа қараусыз қалдырған. 

6 желтоқсанға қараған түні полицияға Орал қаласында қала тұрғынынан көлігінің ұрланғаны жөнінде хабарлама келіп түседі. Иесі өзінің “Рено” маркалы көлігін үйдің ауласына қойып, көліктің қозғалтқышын сөндірмей, оны бірнеше минутқа қараусыз қалдырған. Осы сәтті пайдаланған сол маңнан өтіп бара жатқан белгісіз адам көлікке мініп, жасырынуға тырысқан.
Иесі бірден полицияға жүгінді, содан кейін бірден “Тосқауыл” жоспары енгізілді.

Бейнебақылау камераларының көмегімен ұрланған көліктің орналасқан жерін жедел анықтап, 30 минут ішінде патрульдік полиция батальонының қызметкерлері күдіктіні “ізін суытпай” ұстады, ал көлік иесіне қайтарылды.

Көлікті ұрлау дерегі бойынша сотқа дейінгі тергеу басталды. Күдіктінің мас күйінде болғаны анықталды. Сонымен қатар, ол бұрын көлік құралын басқару құқығынан айырылғандығы белгілі болды.

Полиция азаматтарды көлік құралдарының қауіпсіздігіне мұқият болуға шақырады.