БҚО-да 94 мыңнан астам адам қан айналымы жүйесі ауруларымен есепте тұр
Батыс Қазақстан облысында 94 192 адам қан айналымы жүйесі ауруларымен тіркелген.
БҚО кардиологиялық орталығының директоры Арман Байдеуовтің өңірлік коммуникациялар қызметі алаңында өткен брифингте мәлім еткеніндей, мұндай аурулармен сырқаттанушылық, мүгедектік және өлім-жітім көрсеткіші әлемде алдыңғы орында. Бұл миокард инфарктісі, созылмалы жүрек жеткіліксіздігі, өмірге қауіп төндіретін аритмия, инсульт сияқты асқынуларға әкеледі.
Оның сөзіне қарағанда, биылғы он айда тұрғындарды скрингтік тексерумен қамту 99,5 пайызға жеткен. Соның 10,3 пайызынан дерт анықталған. 99,3 пайызы бақылауға алынған.
«Облыс бойынша ересектерге арналған кардиологиялық 144 төсек-орын бар. Сондай-ақ 12 кардиохирургиялық, 54 кардиологиялық оңалту, 10 кардиохирургиялық оңалту төсектері ересектерге арналған. Жыл сайын стационарда 4 мыңнан астам пациент ем алады. Жүрекке 200-ден астам ашық ота жасалып, 3 мыңнан астам коронарографиялық зерттеу жүргізіледі. Оған қоса 100-ден астам жоғары технологиялық жүрек отасы жасалып, 2 мың консультациялық-диагностикалық қызмет көрсетіледі. Қан айналымы жүйесінің аурулары бойынша өлім-жітім мен мүгедектіктің алдын алу мақсатында шеберлік сағаттары сияқты іс-шаралар тұрақты өткізіліп келеді. Сонымен қатар оталардың барлық түрлерін кардиологиялық орталық мамандары өз бетінше жүргізе бастады», дейді А.Байдеуов.
Оның мәлімдеуінше, барлық дерлік қан айналымы жүйесі ауруларының пайда болуына атеросклероз әсер етеді. Осы бағытта Денсаулық сақтау министрлігімен дислипидемия бойынша жол картасы қолға алынғаны белгілі. Мұның аясында облыста 9 дислипидемия кабинеті ашылып, медициналық мекемелер дәрігерлері оқытылды.
«Бірқатар проблемалық мәселелерді айта кетуге болады. Медициналық жабдықтар мәселесі республикалық және жергілікті бюджет есебінен шешілуде. Кадр тапшылығын шешу облыс әкімдігі тарапынан қолдау тапты. Облыстық кардиологиялық орталықтың ғимараты күрделі жөндеуді қажет етеді. Бұл ретте жаңа кардиологиялық орталықтың жобалық-сметалық құжаттамасы жасалды. МӘМС жүйесінде сақтандырудың болмауы да азаматтарды емдеу кезінде қиындық туғызады», деді А.Байдеуов.
