Батыс Қазақстанда жол апатынан жүргізуші мен жолаушы көз жұмды
Қазіргі кезде аталған дерек бойынша сотқа дейінгі тергеу амалдары жүргізілуде.
БҚО полиция департаментінің баспасөз қызметінен мәлім еткеніндей, оқиға 21 желтоқсан күні Чапаев-Жаңақала жолында болған.
«ВАЗ-2110» және «Лада Приора» автокөліктері бетпе-бет соқтығысты. Салдарынан «ВАЗ-2110» автокөлігінің жүргізушісі мен жолаушысы оқиға орнында жан тапсырды. Сондай-ақ «ВАЗ-2110» автокөлігінде отырған тағы 2 адам және «Лада Приорадағы» 2 жолаушы ауруханаға жатқызылды. Қазіргі кезде аталған дерек бойынша сотқа дейінгі тергеу амалдары жүргізілуде», деп хабарлады ведомстводан.
Бұған дейін Жаңақала ауданында соңы өліммен аяқталған тағы бір жол-көлік оқиғасы болған еді. 7 желтоқсан күні кешкісін Жаңақала ауылында жүргізуші «ВАЗ-2114» автокөлігімен белгіленбеген жерден өтіп бара жатқан екі жаяу жүргіншіні қағып кетті. Олардың біреуі қайтыс болса, екіншісі ауруханаға жатқызылды.
