Оралда өрт қауіпсіздігі талаптарын бұзған компанияға айыппұл салынды

Орал қаласының әкімшілік құқық бұзушылықтар жөніндегі мамандандырылған сотында «ПСП «Серік» ЖШС-ға қатысты іс қаралды.

Облыстық соттың баспасөз қызметінен мәлім еткеніндей, биылғы 23 тамызда БҚО ТЖ департаменті аталмыш серіктестікке Орал қаласы Абай даңғылы 101-мекенжайында орналасқан «Сити Центр» сауда ойын-сауық орталығы аумағында өрт қауіпсіздігі талаптарын бұзу фактілерін жою туралы нұсқама берген.

Негізгі бұзушылықтар сауда дүңгіршектерінің ғимараттан алшақтығына қатысты болды. Бұл төтенше жағдай орын алған жағдайда келушілердің өміріне қауіп төндіруі мүмкін еді. Нұсқамада бұзушылықтарды 22 қазанға дейін жою талап етілген, алайда белгіленген мерзімде бұл талаптар орындалмаған.

Сот отырысында серіктестік өкілі бұзушылықтарды жою үшін қосымша уақыт қажет екенін түсіндірді, себебі компания дүңгіршектерді ғимаратқа біріктіруді және тиісті сәулет-құрылыс құжаттарын рәсімдеуді жоспарлап отырғанын мәлімдеді.

Іс материалдарын зерттеп, тараптарды тыңдағаннан кейін, сот нұсқаманың мерзімінде орындалмағанын анықтап, бұл әрекет ҚР Әкімшілік құқық бұзушылық туралы кодексі 462-бабының 3-бөлігіне сәйкес әкімшілік құқық бұзушылық болып табылатынын растады.

–Сот талқылауының қорытындысы бойынша серіктестікке 516 880 теңге көлемінде айыппұл салу туралы шешім қабылданды. Сондай-ақ сот «Сити Центр» ЖШС-нің жанында орналасқан «GYROS», «ZEBRA COFFEE», «КУНЖУТ» сауда дүңгіршектерінің қызметін үш ай мерзімге тоқтатты.

Сот өрт қауіпсіздігі талаптарын сақтау, әсіресе, адамдар көп жиналатын орындарда ең маңызды факторлардың бірі екенін ерекше атап өтті. Серіктестік өкілі нұсқаманы орындау мерзімін ұзарту туралы өтініш білдіргенімен, сот оны қанағаттандырмады. Өйткені өтініш әкімшілік құқық бұзушылық туралы іс қозғалмай тұрып, уәкілетті органға берілуі керек еді.

ҚР Әкімшілік құқық бұзушылық туралы кодексінің 910-1-бабына сәйкес, егер серіктестік барлық бұзушылықты жойса, қызметін мерзімінен бұрын қайта бастауға құқылы. Сот қаулысы заңды күшіне енді, – деп хабарлады ведомстводан.

ОҚИ ОТЫРЫҢЫЗ: Оралда City Center СОО өртенді