БҚО-да полицейлер көлігі қар құрсауында қалған қарияны іздеп тапты
Зейнеткер дала арқылы өтпекші болып, көлігі қарға тұрып қалған. Байланысқа шығу үшін өзімен телефоны болмаған.
БҚО-да полицейлер көлігі қар құрсауында қалған қарияны іздеп тапты, – деп хабарлайды Polisia.kz.
Бәйтерек ауданынында полиция қызметкерлері Трекино ауылынан Новенький ауылына бағыт алған қарт адамды іздеп тапты. Оның көлігі қарға батып қалған.
Қарияға алаңдаған туыстары полицияға хабарласып, 76 жастағы зейнеткердің уақытында үйіне оралмағанын айтқан. Оны іздестіру жұмыстарына аудандық полиция бөлімінің барлық жеке құрамы тартылды.
Жедел-іздестіру шараларының нәтижесінде қария көлігімен даладан табылды. Зейнеткер дала арқылы өтпекші болып, көлігі қарға тұрып қалған. Байланысқа шығу үшін өзімен телефоны болмаған.
Полиция қызметкерлері көлікті қардан шығаруға көмектесті. Қарт адам полиция қызметкерлерінің көмегімен үйіне аман-есен жетті.
Полиция азаматтарға қысқы кезеңде сақ болуды, байланыс құралдарын өзімен бірге алып жүруді және жақындарына жағдайды хабарлап отыруды ескертеді.
