Оңтүстік Кореяда апатқа ұшыраған ұшақта қазақстандықтардың бар-жоғы белгілі болды

Оңтүстік Кореядағы ұшақ апатынан 181 адамның 179-ы мерт болды. Қазақстанның Сыртқы істер министрлігі 2024 жылы 29 желтоқсанда Оңтүстік Кореяда апатқа ұшыраған Boeing 737 ұшағына қатысты жағдайға қатысты түсінік берді.

«Оңтүстік Корея билігі жариялаған алдын ала мәлімет бойынша, ұшақ бортында Қазақстан азаматтары болмаған», — деді Сыртқы істер министрлігінің ресми өкілі Айбек Смадияров.

Жексенбі күні таңертең Jeju Air әуекомпаниясының ұшағы Муан халықаралық әуежайына шұғыл қонуға әрекеттенген кезде ұшу-қону жолағынан шығып кетіп, қоршауға соғылған. Апат салдарынан ұшақта өрт шығып, артынан жарылыс болды.

Өрт сөндіру қызметі өкілінің айтуынша, соқтығыстан кейін жолаушылар ұшақтан ұшып кеткен. Бортта 181 адам болған, оның алтауы – экипаж мүшелері. Жолаушылардың басым бөлігі Оңтүстік Корея азаматтары, екі адам – Таиланд азаматы.

Бір жолаушы мен бір экипаж мүшесі  – апаттан кейін дереу құтқарылып, Мокпо қаласындағы ауруханаға жеткізілді. Алайда, қалған 179 адамның барлығы қаза тапты.

Алдын ала мәлімет бойынш, ұшақ құспен соқтығысқан. Қазір тергеу амалдары жүргізіліп жатыр.