БҚО-да көп балалы анаға акцизсіз темекі сатқаны үшін айыппұл салмады
Сот бұзушылықты елеусіз деп санап, ауызша ескертумен шектелді.

Тасқала аудандық соты көп балалы анаға қатысты әкімшілік құқық бұзушылық туралы істі қарады. Іс материалдарынан 2024 жылдың қараша айында дүкенде акцизсіз «ORIS» маркалы 41 қорап темекі табылды. Тауардың құны 24 600 теңгені құрады.
Мемлекеттік кірістер басқармасының өкілі бұзушылық фактісін растап, соттан кәсіпкерді жауапқа тартуды сұрады. Отырыста дүкен иесі дүкеннің бір жыл ғана жұмыс істейтінін және акциздік маркалардың қажеттілігі туралы білмегенін түсіндіріп, кінәсін мойындады. Ол сондай-ақ көп балалы ана екенін және мүгедек балаға қамқорлық жасайтынын атап өтті, сондықтан қатаң жазаламауды өтінді.
Заңға сәйкес мұндай бұзушылықтар үшін 150 АЕК мөлшерінде айыппұл қарастырылған. Алайда сот жеңілдететін жағдайларды — кінәні мойындауды, кәсіпкердің қиын жағдайын және өкінуді ескерді. Нәтижесінде сот бұзушылықты шамалы деп санап, ауызша ескертумен шектелді.
Қаулы заңды күшіне енген жоқ.