Батыс Қазақстанда 430 борышкер әкімшілік қамаққа алынды
Батыс Қазақстан облысында өткен жылы мәжбүрлеп орындату саласы бойынша 645 борышкерге қатысты әкімшілік құқық бұзушылық туралы істер қозғалды.
БҚО әділет департаменті басшысының орынбасары Естай Рашқалиевтің өңірлік коммуникациялар қызметі алаңында өткен брифингте мәлім еткеніндей, соның нәтижесінде 173 борышкерге айыппұл салынса, 430-ы әкімшілік қамаққа алынды.
Естай Елтайұлының сөзіне қарағанда, 2024 жылы сот орындаушыларының өндірісінде 152,7 млрд теңгенің 296 954 атқарушылық іс жүргізу құжаты болды. Соның 51,5 млрд теңге болатын 125 851 құжаты орындалды.
-Сот актілерін орындаудан қасақана жалтару ҚР қылмыстық немесе әкімшілік заңнамаларына сәйкес жауаптылыққа әкеп соғады. Осы орайда прокуратура, полиция және жеке сот орындаушылары өңірлік палатасымен бірлескен жұмыстар атқарылуда. Атап айтқанда, өткен жылы сот орындаушыларының ұсынымдары негізінде 4 борышкер ҚР ҚК 139-бабына сәйкес сот үкімімен қылмыстық жауапкершілікке тартылды. 8 қылмыстық іс тараптардың татуласуымен тоқтатылса, 17-сі алдын ала тергеу сатысында қаралуда, – деді Е.Рашқалиев.
Оның айтуынша, әкімшілік жауапкершілікке тартылған адамдар алдыңғы жылмен салыстырғанда, 54,2 пайызға немесе 295 іске көбейген. Әкімшілік қамаққа алынғандар 50,6, айыппұл салынғандар 58,9 пайызға өскен.
-2024 жылы алимент төлемдері бойынша берешегі бар азаматтарды жұмысқа орналастыру үшін жұмыс орындарының 20 жәрмеңкесі өткізілді. Соның нәтижесінде 462 борышкер жұмыспен қамтылды. Бір жылда осы сала бойынша сот орындаушыларына қатысты 125-тен астам арыз-шағым түскен, – деді департамент басшысының орынбасары.
