БҚО дене шынықтыру және спорт басқармасын дзюдодан Еуропа кубогының иегері басқарды

Түркістан облысының 33 жастағы тумасы Бақдәулет Сәбитов Батыс Қазақстан облысының дене шынықтыру және спорт басқармасының басшысы болып тағайындалды. Бұған дейін ол «Ұлттық және ат спорты түрлері орталығы»РМҚК директоры қызметін атқарған.

Сәбитов 2014 жылыЛ.Н. Гумилев атындағы Еуразия ұлттық университетін бітірген. Ол халықаралық дәрежедегі спорт шебері, қазақша күрестен және самбодан Азия чемпионы, дзюдодан Еуропа Кубогының иегері, әлемдік Гран-при жүлдегері.

Облыстық спорт басқармаларының басшыларын тағайындау министрлік комиссиясының шешімі негізінде жүзеге асырылады.

Спорт басқармасы облыста жарыстар өткізуге, спортшыларды республикалық және халықаралық жарыстарға даярлауға, спорт мекемелерін ұстауға бағытталатын 4,5 млрд теңге мөлшерінде бюджетке билік етеді.

Қазақстан өңірлеріндегі спорт басқармалары басшыларының жаппай босатылуы өткен жылдың күзінде Париждегі Олимпиададағы спортшылардың нашар нәтижелеріне байланысты болды.

Туризм және спорт министрі Ербол Мырзабосынов өңірлердегі спорт басқармаларының басшыларын жаппай ауыстыруды былай түсіндірді:

«Мұнда объективті тәсіл бар: соңғы жылдары лицензиялар санынан бастап Олимпиада ойындарында медальдармен аяқталатын нәтижелер айтарлықтай төмендеді. Министрлік комиссия құрды, оның құрамына депутаттар, қоғамдық бірлестіктер мен ведомстволардың өкілдері кіреді. Өңірлерге баратын мамандар үшін бірінші критерий, адам спорт саласынан болуы керек. Бұл спортты басқару менеджментінің негіздерін білетін адам, дайындық теориясы мен әдістемесінің белгілі бір бағыттарын меңгерген адам болуы тиіс», – деді Ербол Мырзабосынов.