Қазақстанда сұйытылған газ бірінші ақпаннан 6-21 теңгеге қымбаттайды
Энергетика министрі Сәтқалиевтің тиісті бұйрығы бүгін Ашық НҚА-да орналастырылды.
«Қазақстан Республикасының аумағында автогаз құю станциялары үшін тауар биржаларынан тыс Қазақстан Республикасының ішкі нарығына сұйытылған мұнай газын жеткізу жоспары шеңберінде сұйытылған мұнай газын бөлшек саудада өткізудің шекті бағаларын бекіту туралы» Қазақстан Республикасы Энергетика министрінің 2023 жылғы 22 желтоқсандағы № 458 бұйрығына өзгеріс енгізу туралы » — осындай атаумен бұйрық орналастырылды.
Қазақстан Республикасының ішкі нарығына сұйытылған мұнай газын жеткізу жоспары шеңберінде өңірлерге байланысты қолданыстағыдан 6-дан 21 теңгеге дейін жоғары сұйытылған мұнай газын бөлшек саудада өткізудің шекті бағалары белгіленеді.
Батыс Қазақстан облысы үшін сұйытылған газды бөлшек саудада өткізудің шекті бағасы 77 теңге, облыс орталығынан 200 (екі жүз) километрден астам қашықтықта орналасқан аудандар үшін 1 литр 82 теңге белгіленеді. Қазір автогаз бағасы 70 және 75 теңге. «Бұл шара ішкі нарықты тұтынуды толыққанды қамтамасыз етуге мүмкіндік береді, газ өңдеуге инвестиция тарту үшін жағдай жасайды», — деп ҚР экономика министрлігі өз шешімін негіздейді.
