Мемлекеттік бағдарлама арқылы алынған үйді жалға беруге бола ма?
Мемлекеттік бағдарлама арқылы ипотекаға алынған үйдің жалға берілгені анықталса, заңбұзушыға айыппұл салынуы және мүлкінен айрылу қаупі төнеді.
Мемлекеттік ипотекалық бағдарлама арқылы алынған үйді жалға бер қаншалық заңды? Бұл сұраққа Massaget.kz тілшісі адвокат Альбина Бахтиярқызы жауап берді.
Адвокаттың сөзінше, мұндай үйді жалға беру заңға қайшы.
«Кейінгі кездері көп адам үйді «7-20-25», «Нұрлы жер» секілді әртүрлі ипотекалық бағдарлама арқылы алады. Ал мұндай бағдарламаларда ай сайынғы төлем төмен. Осындай жағдайды пайдаланып, үйді жалға беріп, пайдаға айналдырып жүрген адам көп. Бірақ егер жауапты органдар тексеріс жүргізетін болса, бұл заңға қайшы әрекет ретінде танылады. Өйткені мемлекеттік ипотекалық бағдарлама арқылы алынған үйді жалға беруге мүлдем болмайды. Бұған қатысты Қазақстан Республикасының заңында бап жауапкершілік қарастырылған», — деді маман.
Сондай-ақ адвокат заңсыз әрекет етіп жүргендерге тексерісті кім жүргізетінін айтты.
«Қазақстанда азаматтардың мұндай заңсыз әрекетін Отбасы банк немесе Тұрғын үй-коммуналдық шаруашылығы немесе жергілікті әкімдіктегі арнайы бөлім тексеруге құқылы», — деді ол.
Қандай жаза қарастырылған?
Мемлекеттік бағдарлама арқылы ипотекаға алынған үйдің жалға берілгені анықталса, заңбұзушыға айыппұл салынуы және мүлкінен айрылу қаупі төнеді.
«Жауапты мекеме тексеріс барысында ипотекаға алынған мүлікті қайтарып алып, шартты бұзуы мүмкін. Сондай-ақ айыппұл салынады, бұған қоса үй жалға берілгені үшін салық төленбеген болса, азаматтың құжаты Салық басқармасына беріледі. Олар да тексеріп, айыппұл салуы әбден ықтимал. Яғни бір сөзбен айтқанда ипотекалық бағдарламаға өзіңіз үшін алынған мүлікті, тек өзіңіз қолдана аласыз», — деп түсіндірді Альбина Бақтиярқызы.
