БҚО тұрғындарына онкологтар 8 ақпанда тегін кеңес береді

Ашық есік күні қала мен облыстың барлық емханаларында, сондай-ақ онкодиспансерде өтеді.

Дүниежүзілік қатерлі ісікке қарсы күрес күні аясында 2025 жылғы 8 ақпанда облыстық онкологиялық диспансерде және Орал қаласы мен облыс аудандарының барлық емханаларында қатерлі ісік аурулары туралы ақпарат алуға, сондай-ақ тегін кеңес алуға болатын Ашық есік күні өтеді.

– МӘМС жүйесіндегі сақтандыру мәртебесіне қарамастан консультация алуға болады. Қабылдауды хирургтар, маммологтар, гинекологтар және уролог 09:00-ден 13:00-ге дейін жүргізеді. Өзіңізбен бірге жеке куәлігіңіз болуы тиіс, – деп түсіндірді БҚО денсаулық сақтау басқармасы.

Айта кетейік, облыстық онкологиялық диспансер Алматы 58 көшесінде орналасқан. Чувашинская аялдамасы (№33, №43, №52 автобустарымен жетуге болады). Қосымша ақпаратты: +7 7112 91 80 52 телефон нөмірі арқылы білуге болады.