Қазақстандықтардың жалақысы ресми көрсеткіштен әлдеқайда төмен болып шықты

Зерттеу нәтижелері бойынша, ең төмен жалақы алатындардың қатарында біліктілігі жоқ жұмысшылар бар – олардың еңбекақысы орташа жалақының тек 44%-ын құрайды. 

Ұлттық статистика бюросының мәліметінше, елдегі орташа айлық жалақы 390 300 теңгені құрайды. Алайда, 16 саланың 9-ында бұл көрсеткіштен төмен жалақы төленеді. Бұл туралы Stan.kz ақпарат агенттігі Energyprom.kz басылымына сілтеме жасап хабарлайды.

Ең төменгі орташа жалақы білім беру, ауыл шаруашылығы, өнер, ойын-сауық және демалыс салаларында тіркелген. Білім беру саласында орташа жалақы – 272 мың теңге, ауыл шаруашылығында – 283,8 мың теңге, ал өнер, ойын-сауық және демалыс саласында – 267,2 мың теңге.

Сарапшылардың айтуынша, номиналды жалақы – бұл тек статистикалық көрсеткіш. Ол жалпы еңбекақы қорын қызметкерлер санына бөлудің нәтижесінде есептеледі. ҰСБ мәліметтеріне сәйкес, өткен жылы барлық салаларда модальды жалақы номиналды жалақыдан төмен болып, 97,6 мың теңгені құраған.  Мұндай жалақы мемлекеттік басқару (97,6 мың теңге), сараптамалық қызмет (117,5 мың теңге), ауыл шаруашылығы (148,8 мың теңге) және т.б салаларда байқалған.

Жылына бір рет Ұлттық статистика бюросының сарапшылары жалдамалы жұмысшылардың жалақы деңгейіне талдау жүргізеді. Соңғы есеп 2024 жылғы сәуір айындағы мәліметтер негізінде жасалған. Бұл деректер әртүрлі деңгейдегі мамандардың жалақысы өз саласындағы орташа көрсеткіштен қаншалықты айырмашылығы бар екенін бағалауға мүмкіндік береді.

“Зерттеу нәтижелері бойынша, ең төмен жалақы алатындардың қатарында біліктілігі жоқ жұмысшылар бар – олардың еңбекақысы орташа жалақының тек 44%-ын құрайды. Қызмет көрсету және сату саласындағы мамандар да орташа деңгейге жете алмайды, олардың жалақысы 51%-ды құрайды. Әкімшілік қызметкерлердің табысы орташа көрсеткіштің 76%-ына тең, ал техникалық мамандар мен көмекші персонал 84% деңгейінде жалақы алады. Керісінше, кәсіби мамандар орташа деңгейден жоғары еңбекақы алады – олардың табысы 111%-ды құрайды, себебі олар көбінесе негізгі қызметкерлер болып саналады. Ал басшылардың жалақысы одан да жоғары, олардың еңбекақысы орташа деңгейден 163%-ға көп”, – дейді сарапшылар.