Оралда мемлекеттік қызметшілер үшін 70 млн-ға жуық теңгеге 9 пәтер жалға алынған
Орал қаласы әкімдігі жалпы сомасы 75 млн теңгеге 10 үш бөлмелі пәтерді жалға алу туралы лоттарды жарияланып, қорытындысын шығарды.
Орал қаласы әкімдігінен мәлім еткеніндей, жалдау мерзімі – екі жыл, яғни 2025 жылдың қаңтарынан 2026 жылдың желтоқсанына дейін.
Мемлекеттік сатып алу конкурсының қорытындысы бойынша 9 пәтермен қамтамасыз етуші анықталды: «Султан» ЖК, «WEST TENDER» ЖК және «SALYK-KAZYNA» ЖК. Лоттардың бірі (7,5 миллион теңгеге пәтер) ойналмады.
Техникалық сипаттамаға сәйкес пәтерлер белгілі бір талаптарға сай болуы керек.
Әкімдіктің түсіндіруінше, «Тұрғын үй қатынастары туралы» заңның 77-бабының 1-тармағына сәйкес коммуналдық тұрғын үй қорынан тұрғын үй немесе жеке тұрғын үй қорынан жергiлiктi атқарушы орган жалдаған баспана тұрғын үй комиссиясы шешімінің негізінде өтініш берушiнiң тұрғылықты жерi бойынша жергiлiктi атқарушы органның шешiмiмен берiледi.
-Жеке тұрғын үй қорынан тұрғын үйді жалға алу ротация тәртібімен лауазымға тағайындалған қызметкерлерге және олардың еңбек қатынастарының сипатына байланысты жұмыс орны бойынша тұруға тиіс лауазымдық міндеттерін атқару кезеңінде Қазақстан Республикасының басқа өңірлерінен келген қызметкерлерге арналған. Сонымен қатар соңғы жылдары Орал қаласы бойынша мемлекеттік тұрғын үй қоры үшін көппәтерлі үйлердің құрылысы жүргізілмегенін атап өткен жөн, — деп хабарлады ведомстводан.
