Батыс Қазақстан облысына ұшқышсыз ұшу апараты құлады
18 ақпанда Бөкей орда ауданы Ұялы ауылдық округі маңынан құлаған пилотсыз ұшу аппараты табылды.
Белгісіз ұшу аппараты 18 ақпанда кешке БҚО, Бөкей ордасы ауданы, Ұялы ауылының аумағынан жергілікті тұрғындар тауып алған. Дронның ұзындығы — 120 сантиметр.
Оқиға орнынан түсірілген суреттерді жергілікті тұрғындар бөлісті. Кейінірек бұл ақпаратты аудан әкімі Нұрлыбек Даумов растады, бірақ түсініктеме беруден бас тартты. Жедел түрде оқиға орнына Ұялы ауылдық округінің полиция қызметкерлері барған. Кейін олармен бірге аудан орталығы Сайхын ауылынан әкімдік, полиция және төтенше жағдайлар қызметінің мамандары да жеткен.
БҚО полициясы аталған ақпаратқа қатысты түсініктеме берді.
«БҚО-да Бөкей ордасы ауданы, Ұялы елдімекені маңында ұшқышсыз ұшу аппаратына ұқсас затты табу фактісі бойынша полиция департаменті уәкілетті қызметтермен бірлесіп тексеру іс-шараларын қолға алды», деп хабарлады өңірлік ПД.
Қазіргі таңда мамандар нысанның шығу тегі мен кімге тиесілі екенін анықтауда. Тергеу жұмыстары жалғасуда.
Бөкей ордасы ауданының аумағында Ресей Федерациясының Қорғаныс министрлігі жалдайтын «Капустин Яр» әскери полигоны орналасқан.
Айта кетсек, 17 ақпанда Қазақстан мұнайын тасымалдайтын Каспий құбыр консорциумы желісіне дрондармен шабуыл жасалған.
ОҚИ ОТЫРЫҢЫЗ: Ресей зымырандары құлайтын БҚО-дағы әскери полигонда заң бұзылып отыр – экология министрлігі
БҚО-да Ресейдің әскери техникасы газ құбырын қағып кетті
БҚО-да газ құбырын соққан ресейлік әскери техника жүргізушісі ескертумен құтылды
Каспий құбыры (КҚК) шабуылға ұшырады: Қазақ мұнайына қауіп төнді ме?
