Атырау облысында кене қаптап, киік қырылып жатыр
Ең көп өлім-жітім Ұлытау, Қарағанды, Қызылорда, Атырау және Батыс Қазақстан облыстарында тіркеліп отыр. Экология министрлігі мамандары киіктердің жаппай қырылуын олардың табиғи өмірлік циклімен байланыстырды.
Атырау облысында кене қаптады. Әсіресе Құрманғазы ауданындағы жайылымдарға зиянкестер қаптады дейді шаруалар, деп хабарлайды Ulysmedia.kz.
КТК телеарнасының мәліметінше, түрлі індет тарататын қансорғыштардың кесірінен киіктер де қырылып жатыр екен.
Жазық далада жануарлардың өлексесі шашылып жатыр. Киікті қырған кене енді төрт түлікті талап жатқан көрінеді. Сондықтан шаруалар зиянкестермен өздері күресуде.
— Жайылымды дәрілеп, оның алдын алмаса, малымыз арам өлетін болды, дейді тұрғындар.
Бұл ауданда ақбөкендер Азғыр, Асан, Сүйіндік ауылдарының аумағында шоғырланған.
ӘКІМДІК НЕ ДЕЙДІ
Құрманғазы ауданы әкімдігінің мәліметінше, қазір ауданға киіктерге жауапты мекеме мамандары, ветеринарлар шақыртылған.
— Сүйіндік ауылының айналасында он шақты киіктің өлексесі табылды. Бірақ кенеден төрт-түлік қырылып жатқан жоқ. Ауданда кесел, індет таралған жоқ, дейді Құрманғазы ауданының әкімі Абат Жанғалиев.
БЕС ОБЛЫСТАҒЫ ЖАҒДАЙ
Еске салайық, бұған дейін Қазақстанның бес облысында қырылған киіктердің өлексесі табылғанын хабарлаған едік. Ең көп өлім-жітім Ұлытау, Қарағанды, Қызылорда, Атырау және Батыс Қазақстан облыстарында тіркеліп отыр. Экология министрлігі мамандары киіктердің жаппай қырылуын олардың табиғи өмірлік циклімен байланыстырды.
