Оралда есірткі еліткен мопедист полициядан жасырынуға тырысқан
Бұрын мопед жүргізушісі жеті жылға жүргізуші куәлігінен айырылған екен.
БҚО полиция департаментінің хабарлауынша, «Қауіпсіз жол» ОПМ кезінде полицейлер Есқалиев көшесіндегі мопедті тоқтатқан. Рульде 26 жастағы ер адам болған. Тоқтағаннан кейін ол қашып кетуге тырысты, бірақ оны ұстап алып, медициналық мекемеге куәландыруға апарды. Дәрігерлер оның есірткі қолданғанын анықтады.
Сонымен қатар, ол 2020 жылы жеті жылға жүргізуші куәлігінен айырылғаны анықталды. Осы факті бойынша қылмыстық іс қозғалды, сотқа дейінгі тергеу жүргізілуде.
Естеріңізге сала кетейік, 2024 жылдың 3 қазанында президент «Жол қозғалысы туралы» заңға және әкімшілік кодекске енгізілген өзгерістерге қол қойды. 2025 жылдың 5 сәуірінен бастап мопедті басқару үшін А1 ішкі санатындағы жүргізуші куәлігі және мемлекеттік нөмір қажет болады.
