Оралда бюджет есебінен 58 көпқабатты үйдің шатыры мен қасбетін жөндеуге 3 млрд теңге жұмсалмақ
«ОА»-на ТКШ қалалық бөлімінде Орал қаласының магистральдық және орталық көшелеріндегі үйлердің қасбеттері мен шатырларын ретке келтіру жұмыстарына бюджеттен 3 миллиард теңге бөлінгені хабарланды. Оларды өткізу мерзімі-2 ай.
Қала әкімдігінің хабарлауынша, Орал қаласында 1715 көпқабатты үй бар, оның 70% — дан астамы өткен ғасырда салынған. Қалада көпқабатты тұрғын үйлердің сыртқы келбетін жаңарту мақсатында бірыңғай сәулеттік келбетті қалыптастыру бойынша жұмыстар жүргізілуде.
Бұл жобаның мақсаты тұрғын үй қорын жақсарту, қаланың заманауи келбетін қамтамасыз ету, сондай-ақ туристер мен инвесторлар үшін қаланың тартымдылығын арттыру.
— Назарбаев даңғылы, Абай даңғылы, Әбілқайыр хан даңғылы, Ю. Гагарин және С. Датов көшелерінің басты назарда. Бұл қаланың негізгі магистральдары, адамдар көп жүретін аймақтар. Қазіргі уақытта 14 мердігерлік ұйыммен жұмыс жүргізілуде. Жөндеу жұмыстары 28 сәуірде басталып, екі айдың ішінде толық аяқталады деп жоспарлануда, — деп хабарлады әкімдік.
Қала әкімінің орынбасары Жандос Дүйсенғалиев нысандарды аралап, жұмыс барысымен танысты, мердігерлерге сапа мен мерзімге ерекше назар аударуды тапсырды.
