ҚМДБ құдайы тамақта астың түр-түрін ұсынатындарға шектеу қоймақ

Енді тек алты түрлі ас ұсынылады.

Енді ас берудің де өзіндік ережесі бар. Дін өкілдері жаназа мен құдайы тамақта аста-төк дастархан жайып, тамақтың түр-түрін ұсынатындарға шектеу қоймақ, деп хабарлады 31 арнаның informburo ақпараттық бағдарламасы.
Тіпті, ол үшін арнайы құжат қабылданды. Яғни, мәзірге енгізілген міндетті тағамдар тізімі бекітілген.
Қазақстан мұсылмандар діни басқармасы қабылдаған құжатқа сәйкес, енді жаназа мен құдайы тамақ бергенде ысырапшылдыққа жол берілмейді. Яғни, қазіргідей аста-төк дастархан жайылып, үстелге түрлі салаттар мен тәттілер қойылмайды. 

Оның орнына тек алты түрлі ас ұсынылады. Олар бауырсақ, шелпек, шәй, су және сары май, тары-талқан, қант кәмпит пен ыстық тағам. 

«Қаралы үйде, кісі қайтқан үйде артында қалғандарға ауыр салмақ түспеуі керек. Әрине, барлығы бұған мәзірді құба-құп көріп қабылдаса, жақсы. Бұған арнайы бір комиссия құрып, бақылап, неге бұлай болып жатыр деуден аулақпыз. Біздікі тек имамдар арқылы жақсылыққа шақырып, ысырапшылдыққа жол бермеу», – деді ҚМДБ уағыз-насихат бөлімінің меңгерушісі Батыржан Мансұров.  

Мүфтияттың бұл бастамасын халықтың дені қолдайды. Көпшіліктің айтуынша, расымен бүгінде құдайы тамақтың дастарханын тойдікінен кем етпейтіндер көп. 
Қабылданған құжатта сонымен қатар құдайы тамаққа бару әдебі жазылған. Мәселен, шариғатқа сай киіну, асқа шақырылған уақыттан кешікпеу сияқты талаптар бар.

Дереккөзі: informburo.kz