Оралда автомектептердің біріне айыппұл салынды
БҚО сауда және кәсіпкерлердің құқықтарын қорғау департаментінің араласуынан кейін автомектепке қатысты әкімшілік іс қозғалды және айыппұл салынды.
БҚО сауда және кәсіпкерлердің құқықтарын қорғау департаментіне Орал тұрғыны жүгінді. Ол 2023 жылы «СЕ»санаты бойынша автомектептердің бірінде оқыды. Теориялық және практикалық емтихан тапсырғаннан кейін ер адам жүргізуші куәлігін алу үшін Арнайы ХҚКО-ға жүгінді. Алайда, ол құжатты ала алмады, өйткені мәліметтер базасында оны оқыту туралы ақпарат болған жоқ.
– Өтінішке сәйкес өтініш беруші бірнеше рет автомектеп басшылығына жүгініп, мәселені шешуді сұрады, алайда мәселе шешілмеді. ол сотқа дейінгі шағымды жіберді. Автомектеп басшылығы тұтынушының шағымына жауап берген жоқ, – деп хабарлады БҚО сауда және кәсіпкерлердің құқықтарын қорғау департаменті.
Департаменттің араласуынан кейін автомектепке қатысты әкімшілік іс қозғалды және айыппұл салынды. Ведомство өтініш берушіге сот тәртібімен жүргізуші куәлігін алуға көмектесуге уәде берді.
