БҚО тұрғыны брокерлерге 26 млн теңгеге аударған
Олардың біреуін әйел сотқа берді.
Сырым аудандық соты жергілікті тұрғынның ер адамға «негізсіз байыту сомасын өндіріп алу туралы» талабы бойынша азаматтық істі қарады.
Іс материалдарына сәйкес, 2024 жылғы маусымда «анықталмаған адам ауыл тұрғынының 26 000 000 теңге мөлшеріндегі ақшасын заңсыз иемденді». Осы соманың 300 000 теңгесі жауапкердің банктік шотына аударылды. Ал талапкер тиісті қылмыстық іс бойынша жәбірленуші деп танылды.
— Сот талапкердің Binance және Kaspi Profit онлайн-платформаларының пайдаланушысы болып табылатынын анықтады. 2024 жылғы 27 маусымда ол өз шотынан «Қазақстан Халық банкі» АҚ-ға жауапкердің шотына 300 000 теңге сомасын аударды. Бұл транзакциялар тиісті банктік үзінді көшірмелермен расталады. Сот талапкердің қаражатты аударуы жауапкердің ешқандай қысымынсыз немесе мәжбүрлеуінсіз ерікті екенін атап өтті. Сондай — ақ, талапкерді Binance платформасында тіркеу криптовалюта сатып алу операцияларына қатысу үшін өз бетінше және саналы түрде жүргізілгені анықталды, — деп түсіндірді сотта.
Ұсынылған дәлелдемелер негізінде сот жауапкер адал әрекет етті және талапкерден алынған ақшаны оның мүддесі үшін криптовалюта сатып алуға жіберді деген қорытындыға келді. Тараптар арасындағы криптовалютаны сатып алу-сату мәмілесі жарамсыз деп танылмаған және мәміле нысанасының болуы расталған. Жауапкердің талапкерге қатысты алаяқтық әрекеттер жасағаны туралы куәландыратын фактілерді сот анықтаған жоқ. Сот шешімімен талапты қанағаттандырудан бас тартылды.
Шешім заңды күшіне енген жоқ.
Жалпы, БҚО тұрғыны түрлі брокерлерге 26 млн теңге аударған.
