Әкімдік қызметкерінен ақша бопсалады деген күдікпен оралдық блогер Айболат Бөкенов ұсталды

Оралдағы билік өкілдерін сынап көзге түскен блогер қолға түсті.

smartnews.kz басылымының хабарлауынша, әлеуметтік желіде белсенділігімен танылған блогер Айболат Бөкенов Ұлттық қауіпсіздік комитеті департаменті тарапынан ұсталды. Бұл туралы Telegram-дағы «Чиновник.kz» арнасы хабарлады.

Басылымның дерегінше, Бөкенов қазіргі уақытта «қорғану құқығы бар куә» мәртебесінде тергеліп жатыр. Тергеу материалдарына сәйкес, ол аудан әкімдігінің бір қызметкерінен ірі көлемде ақша талап еткен. Ақпаратқа қарағанда, блогер лауазымды тұлғаның абыройы мен қадір-қасиетіне нұқсан келтіретін материалдарды жариялаймын деп қорқытып, ақша бопсалаған.

16 шілдеде ақша беру сәтінде ол қолма-қол ұсталған. Тергеушілердің мәліметінше, ол өз кінәсін мойындаған. Қазір бұл іс бойынша «Қорқытып ақша бопсалау» бабы бойынша қылмыстық іс қозғалды. Тергеу жалғасуда.

ҰҚК департаменті әзірге бұл жағдайға байланысты ресми түсініктеме берген жоқ.

Айболат Бөкенов – әлеуметтік желілерде бірнеше паблик пен арнаның иесі ретінде танымал. Ол Батыс Қазақстан облысы билігінің әрекеттерін үнемі сынап, сыни материалдар жариялап келген. Бұған дейін де оның әрекеттері құқық қорғау органдарының назарына түскен болатын.