БҚО-да түйнеме ауруына шалдыққан 22 мал моласы ашық күйінде жатыр
Батыс Қазақстан облысында 2025 жылдың қаңтар-маусым айларында құтыру ауруы бойынша үш ошақ тіркелді. Ал түйнеме (сібір жарасы) ауыруына шалдыққан малдың өлімтігінің 222 көміндісінің 20-сы әлі толық қоршалмаған. Бұл туралы БҚО ветеринария басқармасының басшысы Абзал Бралиев мәлімдеді.
Қазір сібір жарасы көмінділерін қоршау жұмыстары жалғасып жатыр – 2024 жылы 125 көмінді қоршалса, биыл тағы 77 моланы оқшаулау жұмысы аяқталады.
Сонымен қатар, биыл бруцеллезге қарсы тексеру кезінде 3 215 бас мүйізді ірі қара мен 649 ұсақ малдан оң нәтиже анықталған. Бруцеллезге шалдыққан қаралар пышаққа ілінді.
БҚО ветеринария басқармасының басшысының айтуынша, жарты жылдың ішінде облыста 4,7 миллионнан астам малға қауіпті ветеринариялық ауруларға қарсы вакцина егілді. 2025 жылдың алғашқы жартыжылдығында Батыс Қазақстан облысында ветеринариялық қауіпсіздікке 4,8 млрд теңгеден астам қаржы бөлінген.
Облыста жеті жаңа ветеринариялық пункт салынған. Сонымен қатар облыстың ветеринариялық станцияларына 106 жаңа көлік берілген.
Бұған дейін БҚИТУ ветеринария және биотехнология ғылыми-зерттеу орталығының директоры Ғайса Әбсатыров эпизоотияға қарсы іс-шаралардың тиімді ұйымдастырылмай отырғанын сынады. Ғалым жұқпалы ауруларды диагностикалау жұмысының жүргізілмеуі, сала мамандарының тапшылығы мен отандық ветеринариялық препараттардың аз болуы сынды қордаланған мәселелер сол шешілмеген күйі қалып отыр деп есептейді.
2024 жылы Sarapshy.Info сарып ауруының кең таралуына байланысты зерттеу жүргізді. «Республикалық ветеринариялық зертхана» БҚО филиалы 2024 жылдың 9 айында бруцеллез ауруына 620,6 мың ірі қараны зерттеп (96%), 4 836 малдан бруцеллез анықтаған.
БҚО 2027 жылға дейін эпизоотияға қарсы іс-шараларды жүргізуге 16,4 млрд теңге жұмсамақ.
