Қытай инвесторына кедергі: БҚО-да зауыт құрылысына шенеуніктер тосқауыл жасаған
Қабылданған шаралардың нәтижесінде инвестор Қытай тарапымен 100 миллион долларлық келісім жасасып, зауыт құрылысы қайта жалғасты.
Батыс Қазақстан облысында цемент зауытын салуға ниетті қытайлық инвестор жергілікті билікпен келісе алмай, кедергіге тап болды. Мәселеге облыстық прокуратура араласып, араша түсті, деп хабарлайды Orda.kz.
Прокуратура дерегінше, «СпецСтройСервис» ЖШС 2022 жылдан бері жаңа өндіріс орнын салу жобасын іске асырып келеді. Жалпы инвестиция көлемі 75 миллиард теңге. Жоба толық жүзеге асқанда, 60 жаңа жұмыс орны ашылады. Қаржыландыруға шетелдік, соның ішінде қытайлық серіктестер тартылған.
Алайда өндіріс үшін қажет шикізат орналасқан жер теліміне қатысты жер қатынастары басқармасымен келіспеушілік туған. Басқарма компанияны жерді пайдалану шартын бұзды деп айыптап, сотқа жүгінген.
Облыстық прокуратура бұл іске араласып, тараптарды тыңдағаннан кейін шенеуніктерге талап-арыздан бас тартуға ұсыныс жасаған. Бірақ араға бір жыл салып басқарма жер жалдау шартын өз бетінше бұзып, бұл әрекетін сотта қорғап шыққан. Кейін прокуратура сот шешімін қайта қарап, оның күшін жоюға қол жеткізді.
«Қабылданған шаралардың нәтижесінде инвестор Қытай тарапымен 100 миллион долларлық келісім жасасып, зауыт құрылысы қайта жалғасты», деп мәлімдеді ведомство.
Бұл – Қазақстанда Қытай инвестициясымен салынып жатқан жалғыз цемент зауыты емес. Бұған дейін Алматы облысында да Қытай қаржыландырып жатқан зауыт құрылысы ежелгі петроглифтер мен тарихи қорымдарға жақын орналасуына байланысты сынға ұшыраған.
