ІІМ: БҚО-да мал ұрлығымен айналысқан қылмыстық топ ұсталды
Аталған факті бойынша төрт күдікті ұсталды. Қазір алдын ала тергеу амалдары жүргізілуде.
Батыс Қазақстан облыстық полиция департаментінің криминалдық полиция басқармасы қызметкерлері кешенді жедел-іздестіру іс-шараларын жүргізу нәтижесінде Бөкей ордасы ауданының Сайқын ауылында мал ұрлығына қатысы бар қылмыстық топты ұстады, — деп хабарлайды Polisia.kz.
2024 жылдың қараша айынан 2025 жылдың 13 маусымына дейінгі аралықта күдіктілер қыстақтар маңындағы еркін жайылымнан 49 бас ірі қара малды ұрлаған. Келтірілген материалдық шығын көлемі шамамен 20 миллион теңгені құрайды. Олардың мал ұрлығымен байланысты төрт дерекке қатысы бар екені анықталды.
Аталған факті бойынша төрт күдікті ұсталды. Қазір алдын ала тергеу амалдары жүргізілуде.
Ішкі істер министрлігі Мемлекет басшысының тапсырмасына сәйкес мал ұрлығына қарсы күреске бағытталған кешенді шараларды жүзеге асыруды жалғастыруда. Айта кету керек, биылғы жылдың жеті айында республика аумағында мал ұрлығымен айналысқан 55 қылмыстық топтың әрекеті тоқтатылды. Соңғы бес жылда бұл қылмыс түрінің деңгейі 59,2%-ға төмендеген.
Ақпарат көзі: polisia.kz
