Ресей Украинадан 6 мың шаршы шақырым жерді талап етуде – Вэнс
АҚШ вице-президенті Джеймс Вэнстің айтуынша, Ресей Украинаға жаңа аумақтық талаптар қойып отыр. Оның сөзінше, Мәскеу Киевтің бақылауындағы шамамен 6 мың шаршы шақырым жерге дәмелі.
Вэнс бұл туралы One America News телеарнасына берген сұхбатында мәлімдеді.
«Ресейліктер шамамен 6 мың шаршы шақырым аумақты алғысы келеді, олар бұл жерді әлі әскери жолмен басып алған жоқ. Бірақ дәл осыны талап етіп отыр», – деді АҚШ вице-президенті.
Сонымен қатар ол президент Дональд Трамп егер Украинадағы қақтығыс шешілсе, Ресеймен экономикалық байланыстарды кеңейтуге ниетті екенін атап өтті.
«Ресей сізге ұнай ма, жоқ па, олардың дәлелдерімен келісесіз бе, жоқ па – маңызды емес. Нақты факт бар: оларда көп мұнай, көп газ, мол минералды ресурстар бар», – деді Вэнс.
Мәскеудің басқа шарттары
Бұған дейін Кремль Украинанаға талаптарын қойған еді:
- 2022 жылы аннексияланған аумақтардан әскерін шығару;
- НАТО-ға мүше болудан бас тарту;
- Қырымды Ресейдің аумағы ретінде мойындау.
Ресей бұл шарттар қабылданбаса, әскери әрекеттерді жалғастыратынын мәлімдеген.
