Қазақстанда мұнай өндіруге түрік компаниясы келеді
Игерілетін кен орындарынан өндірілген мұнай Түркияға «Баку — Тбилиси — Джейхан» құбыры арқылы тасымалданбақ.
SMARTNEWS.KZ басылымының хабарлауынша, Түркияның мемлекеттік мұнай-газ компаниясы Turkish Petroleum Corporation Қазақстандағы екі мұнай кен орнын игеру жөнінде келісімшартқа қол қоюға дайындалып жатыр, деп хабарлайды Orda.kz.
Türkiye Today дерегінше, бұл туралы Turkish Petroleum Corporation бас директоры Ахмет Тюркоглу Астанада өткен Kazakhstan Energy Week форумында мәлімдеді. Ол Қазақстанның әлемдік мұнай-газ нарығындағы стратегиялық рөлін атап өтіп, бұған дейін «ҚазМұнайГазбен» әріптестік туралы келісімге қол қойылғанын еске салды. Оның айтуынша, Қазақстандағы жаңа жобалар компанияның шетелдік портфелін кеңейтуге мүмкіндік береді.
Игерілетін кен орындарынан өндірілген мұнай Түркияға «Баку — Тбилиси — Джейхан» құбыры арқылы тасымалданбақ. Бұл Анкараға энергетикалық хаб ретіндегі орнын күшейтуге, ал Астанаға — Ресей аумағын айналып өтіп, шикізат экспортын арттыруға жол ашады. Қай кен орындары туралы сөз болып отырғаны әзірге жария етілмеді, бірақ болжам бойынша, Каспий теңізінің жағалауындағы учаскелер болуы мүмкін.
Қазақстан үшін мұнай экспортын БТД бағытымен ұлғайту ұзақмерзімді мүдделерге сай келеді: ол Каспий құбыр консорциумына тәуелділікті азайтуға ықпал етеді. Дегенмен, бұл бағыттағы жеткізу көлемі шектеулі — себебі Әзербайжан қазақстандық мұнайдың сапалық айырмашылықтарына байланысты квотаны көбейтуге дайын емес.
Айта кетейік, биыл тамызда Теңіз бен Қашаған кен орындарынан БТД арқылы тасымал уақытша тоқтаған еді. Бұған резервуарлардың хлоридтермен ластануы себеп болған. Экспорт қыркүйектің ортасында ғана қайта жанданды.
