Келесі жылдан бастап Қазақстанда чипсіз жүргізуші куәліктері беріледі
Жүргізушілер куәлікті уақыты жеткенде ғана ауыстыратын болды.
SMARTNEWS.KZ басылымының хабарлауынша, келесі жылдың алғашқы жартысында (қаңтар–маусым айлары аралығында) Қазақстанда электронды чипі жоқ жаңа форматтағы жүргізуші куәліктері енгізіледі. Бұл туралы ІІМ Әкімшілік полиция комитеті төрағасының орынбасары Әлібек Кеңеспаев мәлімдеді.
Оның айтуынша, жаңа үлгіге көшу кезең-кезеңімен жүзеге асады — жүргізушілер жаңа куәлікті тек алғашқы рет рәсімдеу немесе жоспарлы ауыстыру кезінде алады.
Негізгі мәліметтер:
Бұрын берілген куәліктер жарамдылық мерзімі біткенше заңды күшінде қалады.
Мемлекеттік баж мөлшері өзгермейді — жаңа формат бағаға әсер етпейді.
Жаңарту процесі штаттық режимде, яғни бұрынғыдай қалыпты тәртіппен жүргізіледі.
Кеңеспаевтың айтуынша, бұл бастама цифрландыруды оңтайландыру және артық техникалық шығындарды азайту мақсатында қолға алынған.
