Назарбаев пен Путин тағы да кездесті
Кремльде өткен кездесудің мазмұны мен талқыланған мәселелер әзірге жарияланған жоқ. Дегенмен бұл жүздесу Назарбаевтың ұзақ уақыттан бері көзге түспей жүруінен кейін қоғам назарын ерекше аудартты.
Қазақстанның экс-президенті Нұрсұлтан Назарбаев пен Ресей президенті Владимир Путин кездесті. Саяси тұлғалардың кезекті басқосуы Мәскеудегі Кремль сарайында өтті.
Ресей басшысының баспасөз қызметі жариялаған бейнежазбада қос саясаткердің дөңгелек үстел басында жайғасқаны көрсетілген. Ресми хабарламада кездесудің нақты күн тәртібі мен талқыланған мәселелер туралы кеңінен ақпарат берілмеген. Хабарламада тек жүздескені жайлы жазылған.
“Мұндай дастарқан басындағы кездесу – үлкен сенім мен өте жақсы қарым-қатынастың белгісі. Бұған дейін мұндай құрметке ҚХР төрағасы Си Цзиньпин мен Беларусь президенті Александр Лукашенко ие болған”, – деп жазды ТАСС.
Айта кетейік, Нұрсұлтан Назарбаев Владимир Путинге тұрақты түрде барып тұрады. Ресми мәліметке сәйкес, тараптар соңғы рет 2025 жылғы 29 мамырда жүздескен. Ал экс-президент Нұрсұлтан Назарбаевтың көпшілік алдына соңғы рет шығуы биылғы жылдың маусым айында елордадағы мешіттердің бірінде болған еді.
Кремльде өткен кездесудің мазмұны мен талқыланған мәселелер әзірге жарияланған жоқ. Дегенмен бұл жүздесу Назарбаевтың ұзақ уақыттан бері көзге түспей жүруінен кейін қоғам назарын ерекше аудартты.
