Оралда полиция халықаралық іздеуде жүрген азаматты қолға түсірді
Қазіргі уақытта ұсталған тұлға уақытша ұстау изоляторына қамалды. Аталған дерек бойынша қажетті тергеу әрекеттері жүргізілуде.
Оралда полиция аса ауыр қылмыс жасағаны үшін халықаралық іздеуде жүрген азаматты қолға түсірді, – деп хабарлайды Polisia.kz.
Қазақстан Республикасы Ішкі істер министрлігі өткен жылдардағы қылмыстың ашылуын жіті бақылауда ұстап отыр.
Атап айтқанда, 17 қаңтарда Оралда Батыс Қазақстан облысы полиция департаментінің экстремизмге қарсы іс-қимыл басқармасының қызметкерлері қылмыстық полиция басқармасымен бірлесіп, «Беркут» арнайы жасағының күштік қолдауымен 33 жастағы азаматты ұстады.
Ұстау жедел ақпарат негізінде жүзеге асырылды. Анықталғандай, аталған азамат Орал қаласы аумағында жасалған ер адамды өлтіру дерегі бойынша аса ауыр қылмыс жасағаны үшін 2024 жылдан бері халықаралық іздеуде болған.
Қазіргі уақытта ұсталған тұлға уақытша ұстау изоляторына қамалды. Аталған дерек бойынша қажетті тергеу әрекеттері жүргізілуде.
Ақпарат көзі: polisia.kz
