ХҚКО-ға бармай-ақ көлік рәсімдеуге болады
Құжат пен мемлекеттік нөмірді үйге жеткізу қызметі іске қосылады.
«Азаматтарға арналған үкімет» жүргізушілерге жеткізу қызметін ұсынбақшы. Мемлекеттік корпорация қазір ІІМ-мен бірлесіп, жаңа құжатты жіберу, ескісін қабылдау жолдарын дайындап жатыр. Жоба 2026 жылдың бірінші жартысында іске қосылады. Болжамды жеткізу құны — 5–7 мың теңге. Жеткізу уақыты — сол күні, көлік тіркелген сәттен бастап 4 сағат ішінде.
Бұл жаңа идея емес. 2020 жылы пандемия кезінде курьерлер құжат жеткізген, бірақ қызмет дұрыс жұмыс істемегендіктен сатушы да, сатып алушы да ХҚКО-ға жүгінгенді жөн көрді.
Енді көлік сатып алғанда не сатқанда арнайы ХҚКО-ға бару қажет болмайды. Тұрғындар қазірдің өзінде мәмілені eGov.kz порталы, eGov Mobile мобильді қосымшасы, «ЦОН» немесе банк қосымшалары арқылы онлайн рәсімдей алады. Жеткізу қызметі қосылған соң ақысын төлеп, мүлде үйден шықпай курьерге ескі нөмір мен құжатты беріп, жаңасын алуға мүмкіндік туады.
Жүргізуші айыппұл төлемесе немесе көлікке қатысты заңды мәселе туындаса, арнайы орталыққа баруға тура келеді.
