БҚО-да полицияның заңды талабына бағынбаған ер адам жауапқа тартылды

Ақсайда бір топ адам полиция қызметкерлерінің талаптарын елемеді.

Батыс Қазақстан облысының Ақсай қаласында полицияның заңды талабына бағынбаған бір топ жігітті арнайы жасақ ұстады, деп хабарлайды @bairaq_media

Әлеуметтік желілерде Ақсай қаласында полиция қызметкерлерінің заңды талаптарын орындамаған және агрессивті мінез-құлық танытқан бір топ азаматтың қатысуымен болған бейнежазба тарап жатыр.

Оқиға 29 наурыз күні шамамен сағат 05:00-де болған. Азаматтың өтініші негізінде полиция қызметкерлері мас күйдегі ер адамға қатысты тиісті шаралар қабылдаған.

Тексеру барысында оның таныстары өзін өрескел ұстап, полиция қызметкерлерінің заңды әрекеттеріне кедергі келтіріп, талаптарын елемеген.
Мас күйдегі құқық бұзушы 15 тәулікке әкімшілік қамауға алынды. Агрессия танытып, қарсылық көрсеткен өзге азаматтарға қатысты қылмыстық іс қозғалды. Барлық тұлға анықталып, ұсталды.

«Полиция қызметкерлеріне қысым көрсету, арандату және заңды талаптарды әдейі орындамау әрекеттері қатаң әрі принципті түрде тоқтатылады.
Егер сіз полиция қызметкерлері тарапынан заң бұзушылық болды деп санасаңыз, бұл туралы “102” нөміріне немесе ІІМ-нің өзіндік қауіпсіздік қызметіне 1402 нөмірі арқылы хабарлауды сұраймыз. Әрбір қатысушының әрекетіне толық құқықтық баға беріледі. Азаматтарды тек ресми ақпарат көздеріне сүйенуге және жалған не бұрмаланған мәліметтерді таратудан бас тартуға шақырамыз.»,- делінген ресми хабарламада.