Елімізде жусаннан болатын аллергияға қарсы дәрі жасалды
Жаңа әзірлеменің басты артықшылықтарының бірі — емдеу курсының қысқалығы. Дәстүрлі аллергенге бағытталған терапия ұзақ уақытқа созылуы мүмкін болса, жаңа препарат аптасына бір рет жасалатын небәрі төрт теріасты инъекциясын ғана қажет етеді.
Денсаулық сақтау министрлігі елімізде маусымдық аллергияның ең кең таралған себептерінің бірі саналатын жусан тозаңына болатын аллергияны емдеуге арналған отандық препараттың клиникалық зерттеуінің екінші кезеңін бастады, деп хабарлайды Orda.kz.
Зерттеуге диагнозы расталған 138 науқас қатысады. Препаратты қазақстандық ғалымдар заманауи рекомбинантты аллерген негізінде әзірлеген. Ол халықаралық GMP стандарттарына сай отандық OtarBioPharm кәсіпорнында өндіріледі.
Жаңа әзірлеменің басты артықшылықтарының бірі — емдеу курсының қысқалығы. Дәстүрлі аллергенге бағытталған терапия ұзақ уақытқа созылуы мүмкін болса, жаңа препарат аптасына бір рет жасалатын небәрі төрт теріасты инъекциясын ғана қажет етеді.
Бұған дейін еріктілердің қатысуымен клиникалық зерттеудің алғашқы кезеңі өткен. Зерттеушілердің мәліметінше, айтарлықтай жанама әсерлер тіркелмеген, ал алдын ала нәтижелер аллергенге сезімталдықтың төмендегенін көрсеткен.
