Батыс Қазақстанда биыл мал ауруларының жеті ошағы тіркелген
Батыс Қазақстан облысында жыл басынан бері 590 мың бас ірі қара малы бруцеллезге тексерілді.

БҚО ветеринария басқармасының басшысы Абзал Бралиевтің өңірлік коммуникациялар қызметі алаңында өткен брифингте мәлім еткеніндей, соның 3 723-інен ауру анықталды. Зақымдану пайызы — 0,6 пайыз.
Абзал Серікұлының сөзіне қарағанда, былтыр 864 мың бастың 5 479-ынан (0,6 пайыз) бруцеллез шыққан еді.
Сонымен қатар ұсақ малдың арасында зерттелген 775 668 бастың 609-ынан ауру (0,1 пайыз) табылды. Былтыр 1 млн 358 бас ұсақ малдың 867-сі оң нәтиже (0,1 пайыз) көрсеткен еді.
— 2026 жылы ауру жануарларды санитариялық союды ұйымдастыруға облыстық бюджеттен 56,8 млн теңге қарастырылған. Бруцеллезге шалдыққан жануарлар облыс аумағындағы 12 сою ұйымына тасымалданып, санитарлық сою жүргізіліп отыр. Жыл басынан бері 3 565 бас ірі қара, 528 бас ұсақ мал санитарлық сою орындарына тапсырылды. Ет өңдеу кәсіпорындарына тапсырылған 207 бас ұсақ мал иелеріне 3,6 млн теңге өтемақы төленді, — деді Абзал Бралиев.
Оның айтуынша, биыл облыс бойынша 7 ауру ошағы тіркелді. Соның ішінде ірі қара малы арасында инфекциялық ринотрахеиттен 3 (Ақжайық ауданының Шабдаржап, Атамекен, Жолап ауылдары), бруцеллезден 2 (Бәйтерек ауданының Көшім ауылы, Теректі ауданының Подстепное ауылы), қарасан ауруынан 1 ошақ (Теректі ауданының Сарыөмір ауылы) анықталды. Оған қоса Бәйтерек ауданы Достық ауылында қарсақтың құтырғаны белгілі болды.
— Ауру ошақтарына тиісті ветеринариялық іс-шаралар кешені толық көлемде жүргізіліп, инфекциялық ринотрахеит, қарасан және 1 бруцеллез ауруының ошақтары жойылды. Қазіргі таңда ірі қара малының бруцеллезі тіркелген 1 ошақта және қарсақтан құтыру анықталған жерде ветеринариялық іс-шаралар жүргізіліп жатыр. Облыс аумағында эпизоотиялық жағдай тұрақты, — деп қосты Абзал Бралиев.
Басқарма мәліметі бойынша биыл өңірдің эпизоотиялық қауіпсіздігін қамтамасыз етуге 6,7 млрд теңге бөлінді. Бұл қаражат эпизоотияға қарсы іс-шараларды жүзеге асыруға, санитарлық малдардың тасымалына, ауыл шаруашылығы жануарларын бірдейлендіруге арналған сырғаларды сатып алуға, ветеринариялық препараттарды тасымалдауға, сондай-ақ саланың материалдық-техникалық базаны нығайтуға бағытталған.
