Қазақстанда бензин мен дизель отынының бағасы жыл соңына қарай қымбаттауы мүмкін

Регулятор ЖЖМ бағасының қазіргі жылдық өсу қарқыны 2026 жылдың соңына дейін сақталады деп есептейді. Алайда, бұрынғы болжаммен салыстырғанда Ұлттық банктің күтулері нашарлаған.

Ұлттық банк 2026 жылдың соңына қарай жанар-жағармай материалдары бағасының айтарлықтай өсуін күтуде. Сонымен қатар, отынның қымбаттауының салдарын қазақстандықтар келесі жылы басқа тауарлар мен қызметтердің бағасы арқылы сезіне алады, деп хабарлайды Ulysmedia.kz.

Толығырақ

Ұлттық банктің тамыз айындағы баяндамасына сәйкес, мораторий аяқталғаннан кейін Қазақстанда мұнай өнімдерінің бағасы нарықты кезең-кезеңімен либерализациялау аясында біртіндеп өзгеріп жатыр.

Регулятор ЖЖМ бағасының қазіргі жылдық өсу қарқыны 2026 жылдың соңына дейін сақталады деп есептейді. Алайда, бұрынғы болжаммен салыстырғанда Ұлттық банктің күтулері нашарлаған: ендігі жерде жыл соңында ЖЖМ бағасының неғұрлым жоғары өсімі есепке алынып отыр. Баяндамада бензин мен дизельдің нақты бағасы немесе теңгемен шаққандағы қымбаттау көлемі көрсетілмеген.

Алдымен бензин, содан кейін тауарлар қымбаттайды

Отын бағасының өсуі әлі жалпы инфляция деңгейіне толық әсер етіп үлгерген жоқ. Ұлттық банктің пайымдауынша, бұл қымбатшылықтың жанама әсері негізінен 2027 жылдың басында айқын біліне бастайды.

Қарапайым тілмен айтқанда: жанармай қымбаттаған кезде, бизнес тасымалдау мен өндіріске көбірек шығын шығарады. Бұл шығындар кейіннен тауарлар мен қызметтердің соңғы бағасына (чекке) әсер етеді. Ұлттық банк дәл осы екінші реттік әсер инфляция үшін негізгі тәуекелдердің бірі болып қала беретінін ескертеді.

ЖЖМ бағасының өсуі инфляцияның жылдам төмендеуіне кедергі келтіріп отыр. Мысалы, тамыз айында азық-түлік емес тауарлар бір жыл ішінде 11,4%-ға қымбаттаған. Регулятор отынның бағаға тек тікелей емес, логистиканың қымбаттауы арқылы да әсер ететінін алға тартады.

Ұлттық банктің базалық болжамы бойынша, 2027–2028 жылдары ЖЖМ бағасының өсу қарқыны инфляциялық мақсатқа (5%) сәйкес келетін деңгейге біртіндеп оралуы тиіс.

Дегенмен, регулятор отын бағасының айналасында әлі де белгісіздік барын мойындайды. Тәуекелдердің қатарында сыртқы мұнай өнімдері нарығындағы жағдай мен өңірдегі отын дағдарысы атап өтілді.

Егер жағдай базалық болжамнан нашарласа, Ұлттық банк ЖЖМ бағасының жоғары өсу қарқыны ұзағырақ сақталуы мүмкін екенін жоққа шығармайды.